Madaxweyne Rayaale Oo Ku Dhawaaqay Afar Gobol Oo Cusub,Kalana ah Gabilay, Saylac,Oodweyne iyo Buuhoodle iyo Dareenkii ka Dhashay.

(Madaxweyne Rayaale)
hadhwanaag 2008-03-19 (Hadhwanaagnews) Hargeysa(HWN):- Madaxweynaha Somaliland Md.Daahir Rayaale Kaahin ayaa kulan qado sharafeeda oo uu shalay la yeeshay Madax-dhaqameedka Degmada Gabilay ugu balanqaaday ku dhawaaqida Gobolnimada Degmadaasi Gabilay, taas oo ay muddo badan Naawilayeen.

Kulankaasi oo ka dhacay Xarunta Qasriga Madaxtooyada Somaliland.

Sida waxa Shabakada Hadhwanaagnews.com u xaqiijiyey qaar ka mida Cuqaashii ka qeybgashay Shirkaasi.

Cuqaasha iyo waxgaradka ka socotay Degmada Gabilay oo la sheegay inay tiradoodu gaadhaysay 40-tameeyo oday, ayaa waxa uu kulankaas uu Madaxweyne Rayaale la yeeshay waxa uu ku wargeliyey oo uu madaashaasi ka shaaciyey gobolnimadii Degmada Gabilay.

Inkasta oo aanay ilaa imika jirin war cad oo ay Xukuummadu ka soo saartay arrintaasi, hadana waxa sidaa waxa noo xaqiijiyey deuqeydii ka qeybgashay kulnakaasi.

Ku dhawaaqida Madaxweyne Rayaale ee Gobolnimada Degmada Gabilay waxay salka ku haysaa fulinta balanqaadyadii uu hore ugu sameeyey Degmadaasi, waxaana Sidoo kale Madaxweyne Rayaale u cuskaday ku dhawaaqida Gobolnimada Degmada Gabilay balanqaad uu hore Madaxweyne Marxuum Maxamed Ibraahim Cigal u sameeyey Degmadaasi ka mid noqoshada Gobolada dalka.

Warku waxa uu inta ku daray inaanay Degmada Keli ku ahayn Magacaabista Gobolnimada ee Madaxweyne Rayaale ku wargeliyey Madax-dhaqameedka iyo waxgaradka Degmadaasi Gabilay, Balse ay ku jiraan meelo kale oo ay ka mid yihiin Degmada Oodweyne, Saylac iyo Weliba Buuhoodle oo uu iyagana Sheegay inay Gobolo noqonayaasn.


Arrintan ayaa ku soo beegaantay Wakhti adag oo xasaasiya, taas oo la isku diyaarinayo guda galka doorashooyin fooda inagu soo haya. Si kastaba ha ahaatee dadka ku dhaqan Caasimada Hargeysa ayaa aad u hadal hayey arrintan, kadib markii ay Saaka ku soo baxday joornaalada dalka qaarkood, dadka oo ku kala qeybsamay ku dhawaaqida Madaxweyne Rayaale ee Gobolada Afarta ah, taas oo ay dadka qaar ku sifeeyeen inay ka qeyb tahay ololaha Madaxweyne Rayaale kaga qeybgalayo doorashooyinka inagu soo socda, si uu ugu kasbado oo uu taageero uga helo shacbiga ku nool deegmooyinkaas uu hoosta ka xariiqay inuu Gobol ka dhigidoono.


Hadhwanaagnews.com/Office
Hargeysa/Somaliland.